Ollando as músicas do mundo
Sons da Diversidade naceu coma un ciclo de difusión do que coñecemos como músicas de raíz. Un proxecto que puxo en marcha a Concellaría de Cultura de Santiago de Compostela no ano 2004, para o que contou coa colaboración da produtora Nordesía, e que resultou ser a mellor proposta para a dinamización dun espazo como é o Auditorio de Galicia, hoxe emblemático.Catro anos de vida xa para este Sons da Diversidade que veu darlle cor ás primaveras e outonos composteláns coa música de máis de 30 artistas de todo o mundo. Michael Nyman, Lila Downs, Lhasa, Habana Blues Band, Lamatumbá, Kroke, Adriana Calcanhoto, Goran Bregovic ou Jane Birkin foron só algúns deles, e houbo tamén propostas colectivas coma Ao pé da letra ou Doménico + 2.
O inverno e a primavera de 2008 van ter, outra volta, unha nova cor e un novo sabor coas actuacións dos irlandeses Moving Hearts o 19 de xaneiro, concerto inaugural da nova tempada. Despois deles chegará Ute Lemper, no mes de febreiro; Uxía, en marzo; Tom Zé, en abril; Laurie Anderson, en maio; e Rufus Wainwright, en xuño.
